දුම්රිය හරස් මාර්ග ඛේදවාචකය

දුම්රිය හරස් මාර්ගයක ගමන් කිරිම නිසා පහුගිය කාලේ ඇතිවුන මරණ වලට කව්ද වග කියන්න ඕනේ කියන එක දැන් හැම තැනම කතාවෙනවා.  පෙරේදා කුරුණෑගලදී ඇතිවුන සිද්ධියේදී ගේට්ටු කරුවන්ගේ වැරැද්ද කියවෙනවා. සමහරු කියනවා මේ ප්‍රවාහණ ඇමතිගේ වැරැද්දක්ලු, රජය මේ දේවල් වලට අවධානය යොමු කරනවා මඳිලු.

මම නම් හිතන්නේ මේකට ප්‍රධාන වශයෙන් වග කියන්න ඕනේ පාර මාරුවෙන අපි.

ඇයි මේ දුම්රියක් එද්දි ජීවිත අවදානමට දාලා පාර පැනලා යන්න හදන්නේ? දුම්රිය පහුවෙනකම් විනාඩි දෙක තුනක් ඉන්න තරම් අපි විනයානුකූල වෙලා නැත්තේ ඇයි? මේ තරම් හදිස්සියෙන් ගිහිල්ලා අපි මොනවද කරන්නේ?

හොඳට නිරීක්ෂණය කරලා බලන්න, දුම්රිය හරස් මාර්ගයක ගේට්ටුව වහන්න එලාම් එක වැදෙද්දී කී දෙනෙක් පාර හරහා යනවද? ඒ බෙල් එක වදින්නේ දැන් පාර හරහා යන එක නවත්තන්න කියන්න.

ඊට පස්සේ ගේට්ටුව බාගෙට වැහෙද්දි වාහන සහ මිනිසුන් කී දෙනෙක් ඒ හරහා යනවද?

ගේට්ටුව වැහුනට පස්සේ, ඉස්සරහින් පිළිවෙලට නවත්තලා තියෙන වාහන වලට පිටින් ඇවිල්ලා, මෝටර් බයිසිකල් සහ ත්‍රී වීලර් කීයක් ඉස්සරහින් නවත්තලා පාර අවහිර කරනවද? සමහරු පදික වේදිකාවෙනුත් වාහන ගේනවා. සමහර වෙලාවට ප‍ා‍‍රේ දකුණු පැත්ත හිස් නිසා මේ අය ඒ පැත්තෙනුත් අවිල්ලා ගේට්ටුව ඉස්සරහින්ම නවත්ත ගන්නවා. ගේට්ටුව ඇරියහම මේ අය යන්නේ හරියට තරඟයක් ආරම්භ කරන සංඥාව දුන්නා ‍වගේ කිසිම හෙවිල්ලක් බැලිල්ලක් නැතුව. මේ අයට පාරේ විනය කියන දේ සහ ඉවසීම කියන දේ කියලා දෙන්න විදිහක් නැද්ද? මේ විදිහට ගිහිල්ලා අනතුරක් වුනොත් වැරැද්ද රජයේ නැත්නම් දුම්රිය දෙපාර්තමේන්තුවේ.

අනාරක්ෂත හරස් මාර්ගයකදී වුනත්, ඇයි අපිට බැරි පාර දෙපැත්ත බලලා, දුම්රියක් එනවද කියලා බලලා යන්න බැරි. ඔය වුන අනතුරු වැඩි හරියක් වුනේ, දුම්රිය එනවා දැක දැක පාර හරහා යන්න උත්සහ කරපු අය. එහෙම නැතුව දුම්රියක් පේන්නවත් නැතුව තියෙද්දි පාර මාරුවෙන්න යද්දී, නොපෙනී ආපු දුම්රියක හැපුනා වෙන්න බෑනේ. මේ තරම් හදිස්සියේ කොහෙද අපි යන්නේ?

මේවට තමයි විනය අවශ්‍ය කරන්නේ. ඒක හදන්න පටන් ගන්න ඕනේ පාසලින් නෙවෙයි, ගුරුවරුන්ගෙන් සහ දෙමව්පියන්ගෙන්. තමන්ගේ දරුවත් ඇදගෙන පාර මාරුවෙන කහ ඉරක් නැති තැන්වලින් මොන තරමක් දෙමව්පියන් පාර පනිනවද?

විදුලි සංඥා තියෙන තැන්වලදි වුනත් කී දෙනෙක් රතු එලිය තියෙද්දි යනවද? මේවා හදන්න බැරිනම් මොන රජය ආවත්, මොන ගේට්ටු දැම්මත්, මේ විනාශය නවත්තන්න බැහැ.‍

මුලින්ම අපි විනය අනුව හැදිලා ඉමු.

පහත වීඩියොව බලලා අපි ගැන ලජ්ජා නොවී ඉන්න පුළුවන්ද බලන්න.

https://www.youtube.com/watch?v=sXVjdGPWNpg